Алдын алу шаралары әрдайым қолжетімді: АИТВ орталығының мамандары Ақтөбе мыс компаниясының вахталық кентіне барды

 

Қараша 13, 2026

Профилактикалық науқан аясында Ақтөбе облыстық АИТВ инфекциясының алдын алу орталығының мамандары Ақтөбе облысы Хромтау ауданы Көктaу ауылында орналасқан «Ақтөбе мыс компаниясы» ЖШС вахталық кентінде ақпараттық-ағартушылық акция өткізді.

Іс-шара барысында кәсіпорын қызметкерлеріне АИТВ инфекциясының алдын алу мәселелеріне арналған дәріс оқылды. Мамандар АИТВ-ның берілу жолдары, одан қорғану тәсілдері, уақтылы тестілеуден өтудің маңыздылығы және өзінің АИТВ мәртебесін білудің қажеттілігі туралы ақпарат берді.

Сонымен қатар АИТВ инфекциясы туралы кең таралған жаңсақ пікірлерді жоққа шығаруға және өз денсаулығына жауапкершілікпен қарауды қалыптастыруға ерекше назар аударылды. Акцияға қатысушыларға АИТВ инфекциясы және оның алдын алу шаралары туралы пайдалы ақпарат қамтылған ақпараттық-білім беру материалдары таратылды.

Дәрістен кейін барлық ниет білдірген қызметкерлер АИТВ-ға тегін экспресс-тестілеуден өтіп, мамандардан жеке кеңес алып, өздерін толғандырған сұрақтарға жауап алу мүмкіндігіне ие болды.

  • «Мамандардың тікелей вахталық кентке келіп, АИТВ инфекциясы туралы нақты ақпарат беріп, сол жерде тестілеуден өтуге мүмкіндік жасағаны өте маңызды. Медициналық мекемеге өз бетіңше баруға әрдайым мүмкіндік бола бермейді. Сондықтан мұндай көшпелі акциялар қызметкерлер үшін өте пайдалы», – деп бөлісті кәсіпорын қызметкері Талғат.

Ақпараттық-профилактикалық іс-шарамен барлығы 141 адам қамтылды, оның ішінде 30 қызметкер АИТВ-ға экспресс-тестілеуден өтті.

Мұндай көшпелі іс-шараларды өткізу жұмыс істейтін халық үшін профилактикалық қызметтердің қолжетімділігін арттыруға, АИТВ инфекциясы туралы білім деңгейін көтеруге және денсаулыққа жауапкершілікпен қарау мәдениетін қалыптастыруға ықпал етеді.

Өзінің АИТВ мәртебесін білу – өзіңе, жақындарыңа және болашағыңа қамқорлық жасау!

барлық жаңалықтар »