Қазақ дерматология және инфекциялық аурулар ғылыми орталығы

Алматыда АИТВ-инфекциясының алдын алу, ерте диагностикалау және емдеудің қолжетімділігі мәселелеріне арналған «АИТВ: кеше, бүгін, ертең» атты халықаралық конференциясы өтіп жатыр. Оған Қазақстанның ЖИТС орталықтарының басшылары, Орталық Азия елдерінің мамандары, ДДҰ мен CDC өкілдері қатысуда.Конференцияны ҚР Денсаулық сақтау министрлігі мен Қазақ дерматология және инфекциялық аурулар ғылыми орталығы ұйымдастырды. Денсаулық сақтау министрлігі Медициналық көмекті ұйымдастыру департаментінің директоры Гүлнара Сәрсенбаеваның мәліметінше, Қазақстанда АИТВ-инфекциясымен өмір сүретін 36 мыңға жуық адам диспансерлік есепте тұр. 2026 жылдың басынан бері 2 мыңнан астам жаңа жағдай анықталған.«Біздің міндетіміз – уақтылы диагностикалаудан бастап, емдеу мен пациенттерді бақылауға дейінгі барлық кезеңде медициналық көмектің қолжетімділігін қамтамасыз ету», – деп атап өтті Гүлнара Сәрсенбаева.Конференцияға қатысушылар АИТВ-ға тестілеудің қолжетімділігін арттыру, инфекцияны кеш анықтау жағдайларын азайту, сондай-ақ алғашқы медициналық-санитариялық көмек ұйымдары мен мамандандырылған орталықтардың өзара әрекетін жақсарту жолдарын талқылап жатыр.Қазақстанда АИТВ-инфекциясы негізінен жыныстық қатынас арқылы жұғады. Вирус қан арқылы, сондай-ақ анадан балаға жүктілік, босану немесе емшекпен емізу кезінде де берілуі мүмкін. АИТВ құшақтасу, қол алысу, ортақ ыдысты пайдалану немесе ауа-тамшы жолы арқылы берілмейді. Инфекция ұзақ уақыт бойы айқын белгілерсіз өтуі мүмкін, сондықтан АИТВ-ға уақтылы тестілеуден өту маңызды.АИТВ-ға тестілеу және қажетті медициналық көмек тегін медициналық көмектің кепілдік берілген көлемі (ТМККК) шеңберінде көрсетіледі. Ретровирусқа қарсы терапия инфекцияны бақылауда ұстауға және өмір сүру сапасын сақтауға мүмкіндік береді. АИТВ-ның анадан балаға берілуінің алдын алуға ерекше көңіл бөлінуде. Жүкті әйелдерде АИТВ-инфекциясы анықталған жағдайда оларға қажетті ем тағайындалып, медициналық бақылау қамтамасыз етіледі. Конференцияда жарияланған мәліметтерге сәйкес, жүкті әйелдердің шамамен 96%-ы профилактикалық іс-шаралармен қамтылған.Конференция АИТВ-инфекциясының алдын алу, диагностикалау және медициналық көмектің қолжетімділігін арттырудың заманауи тәсілдерін талқылауға, сондай-ақ тәжірибе алмасуға арналған алаңға айналды.

Алматыда АИТВ-инфекциясын ерте диагностикалау, емдеудің қолжетімділігін қамтамасыз ету және АИТВ-инфекциясына қарсы күрес қызметін дамыту мәселелеріне арналған «АИТВ: кеше, бүгін, ертең» атты халықаралық конференциясы өтіп жатыр.2026 жылдың тоғыз айында Қазақстанда АИТВ-инфекциясының 2 492 жағдайы анықталды. Пациенттердің 30%-ында CD4 жасушаларының деңгейі 200-ден төмен болған, бұл иммунитеттің айтарлықтай төмендегенін көрсетеді.Бұл туралы Қазақ дерматология және инфекциялық аурулар ғылыми орталығының директоры, медицина ғылымдарының докторы, профессор Роза Қуанышбекова мәлімдеді. Оның айтуынша, диагнозының жария болып кетуінен және қоғам тарапынан айыпталудан қорқу адамдардың уақтылы тестілеуден өтуіне кедергі келтіруі мүмкін. Сондықтан алаңдаушылықты жеңуге және АИТВ-ға қатысты теріс түсініктерден арылуға көмектесетін психологиялық қолдау маңызды рөл атқарады.«Бүгінде медицинаның мүмкіндіктері АИТВ-мен өмір сүретін адамдарға толыққанды әрі ұзақ өмір сүруге жағдай жасайды. Біздің міндетіміз – инфекцияны уақтылы анықтауды, тиімді емдеудің қолжетімділігін және сапалы медициналық сүйемелдеуді қамтамасыз ету», – деп атап өтті Роза Қуанышбекова.Балалар арасында АИТВ-инфекциясының алдын алу, соның ішінде ауруды уақтылы анықтау мен медициналық сүйемелдеудің маңыздылығы жеке тақырып ретінде қарастырылды. Конференцияға Қазақстанның ЖИТС орталықтарының басшылары, Орталық Азия елдерінің мамандары, сондай-ақ ДДҰ, CDC және EPIC жобасын қоса алғанда, халықаралық ұйымдардың өкілдері қатысуда. Олар тәжірибе алмасып, АИТВ-инфекциясының алдын алу, диагностикалау және АИТВ-мен өмір сүретін адамдарға медициналық көмек көрсетудің заманауи тәсілдерін талқылауда.Конференцияны Қазақстан Республикасының Денсаулық сақтау министрлігі мен Қазақ дерматология және инфекциялық аурулар ғылыми орталығы ұйымдастырды.

Бұл туралы Алматыда өткен халықаралық конференцияда айтылды. Мамандардың пікірінше, қауіпті инфекцияны анықтайтын тексерулер қолжетімді болуы қажет. Сонымен қатар бұл дерттің қаупі туралы бала кезден үйрету мәселесі көтерілді.Елімізде адамда иммунитет тапшылығы вирусының бар-жоғы тегін тексеріледі. Дерт расталса, мемлекет дәрі-дәрмекпен қамтамасыз етіп, тегін медициналық көмек көрсетеді. Өкінішке орай, биыл осы кеселді жұқтырғандардың 56 пайызы ауруы асқынғанда бір біліпті. Себебі Адамның иммунитет тапшылығы вирусы әуелгі кезде көп жағдайда симптомсыз жүреді. Қазір 36 мыңнан аса адам медициналық бақылауда тұр.

????️ Спикер: Өтегенова Әлия Қазиқызы, медицина ғылымдарының кандидаты, ҚР ДСМ Қазақ дерматология және инфекциялық аурулар ғылыми орталығының клиникалық мониторинг бөлімінің дерматовенеролог дәрігері.

Алматыда Қазақ дерматология және инфекциялық аурулар ғылыми орталығының директоры Роза Қуанышбекова Дүниежүзілік денсаулық сақтау ұйымының (ДДҰ) Қазақстандағы Елдік кеңсесінің басшысы Dr. Skender Syla және ДДҰ Еуропалық аймақтық бюросының инфекциялық аурулар жөніндегі бөлімінің (АИТВ, вирустық гепатиттер және ЖЖБИ) басшысы Stela Bivol-мен кездесті. ДДҰ өкілдері Қазақстанның АИТВ-мен өмір сүретін адамдарға медициналық көмекті ұйымдастырудағы елеулі жетістіктерін атап өтіп, еліміз осы санаттағы пациенттер үшін диагностиканың, ретровирусқа қарсы терапияның және медициналық қолдаудың қолжетімділігін қамтамасыз етуде аймақтағы озық тәсілдердің бірін көрсетіп отырғанын айтты. Кездесуде АИТВ-ның алдын алу, ерте анықтау, диагностикалау және емдеу бағытындағы ынтымақтастықтың 2026–2027 жылдарға арналған басым бағыттары талқыланды.

Қазақстанда ҚР азаматтарына АИТВ инфекциясын емдеу тегін ұсынылатынын білесіз бе?