Жетісу облысында АИТВ-инфекциясының сырқаттанушылық көрсеткіші төмендеді.

Шілде 30, 2026

2026 жылдың бірінші жартыжылдығында Облыстық АИТВ-инфекциясының алдын алу орталығы АИТВ-инфекциясының алдын алу, диагностикалау және емдеу бағытында елеулі нәтижелерге қол жеткізді.

Алты ай ішінде Орталық мамандары 139 ақпараттық-алдын алу іс-шарасын өткізіп, 7,5 мыңнан астам облыс тұрғынын қамтыды. Алдын алу жұмыстары білім беру ұйымдарында, медициналық мекемелерде, мемлекеттік органдарда және еңбек ұжымдарында жүргізілді. Дәрістер, кеңес беру және ақпараттық материалдарды таратумен қатар, АИТВ-ға өзін-өзі тестілеуді насихаттау бойынша ақпараттық науқан іске асырылды.

Эпидемиологиялық бөлімнің мәліметтері бойынша, 2026 жылдың бірінші жартыжылдығындағы басты жетістіктердің бірі – АИТВ-инфекциясы бойынша сырқаттанушылықтың төмендеуі болды. Өткен жылдың осы кезеңімен салыстырғанда алғаш анықталған АИТВ-инфекциясы жағдайларының саны 1,6 есеге азайды. Сонымен қатар балалар, жасөспірімдер, донорлар және реципиенттер арасында АИТВ жұқтыру жағдайлары тіркелген жоқ. Бұл жүргізіліп жатқан профилактикалық және эпидемияға қарсы іс-шаралардың тиімділігін көрсетеді.

Өңірде АИТВ-ның анадан балаға берілуінің алдын алу бағдарламасымен қамту деңгейі 100%-ды сақтап отыр. Бұл жаңа туған нәрестелердің инфекцияны жұқтыру қаупін барынша төмендетуге мүмкіндік береді.

Заманауи ем әрбір пациент үшін қолжетімді. Диспансерлік есепте тұрған адамдардың 96%-ы антиретровирустық терапия алады, ал олардың 89%-ында вирустық супрессияға қол жеткізілген. Бұл «Анықталмайтын = Жұқтырмайтын (U=U)» қағидатының тиімділігін дәлелдейді, яғни вирустық жүктемесі анықталмайтын адам АИТВ-ны жыныстық жолмен өзгелерге жұқтырмайды.

Бүгінде Жетісу облысында АИТВ-мен өмір сүретін адамдардың 82%-ы өз мәртебесін біледі, ал Қазақстан Республикасының АИТВ-мен өмір сүретін барлық азаматтары кепілдендірілген медициналық көмек көлемі аясында қажетті еммен қамтамасыз етіледі.

Сондай-ақ негізгі топтармен жұмыс жалғасуда. Үкіметтік емес ұйымдармен бірлесіп жүргізілген жұмыстың нәтижесінде негізгі топ өкілдерін тестілеумен қамту көрсеткіші 98,6%-ға жетті, ал осы топтағы АИТВ-мен өмір сүретін адамдардың 89%-ы антиретровирустық терапия алуда.

барлық жаңалықтар »