Акушер-гинеколог дәрігерлерге арналған семинар

Мамыр 28, 2026

АИТВ инфекциясының алдын алу орталығында АИТВ инфекциясының вертикальды жолмен берілуінің алдын алу, жүкті әйелдер мен олардың жыныстық серіктестерін тексеруден өткізу мәселелері бойынша оқыту семинары өтті. Іс-шара 2026 жылғы I тоқсан қорытындысы негізінде ұйымдастырылды.

Семинардың ашылуында Орталық директорының міндетін атқарушы Д.В. Панченко жүкті әйелдерді АИТВ инфекциясына, мерезге және вирустық гепатиттерге қолданыстағы ұсынымдарға сәйкес уақытылы тексеруден өткізудің маңызына ерекше тоқталды. Ол зертханалық тексерудің мерзімі мен кезеңділігін сақтау инфекцияларды ерте анықтаудың және АИТВ инфекциясының вертикальды жолмен берілуінің алдын алудың маңызды шарты екенін атап өтті.

Эпидемиология бөлімінің меңгерушісі Б.К. Култанова семинар барысында 2026 жылғы I тоқсандағы Астана қаласы бойынша АИТВ инфекциясына қатысты эпидемиологиялық ахуал туралы баяндады. Ол көрсеткіштерді 2025 жылғы I тоқсанмен салыстырып, жүкті әйелдер мен олардың жыныстық серіктестері арасындағы негізгі эпидемиологиялық деректерге, қол жеткізілген нәтижелер мен алдағы міндеттерге тоқталды.

АИТВ орталығының дәрігер-эпидемиологі Г.А. Сакупова акушер-гинекологтардың назарын жүкті әйелдердің тізімін қалыптастыру және олардың жыныстық серіктестерін медициналық ұйымдар бойынша тексеруден өткізу мәселелеріне аударды. Сонымен қатар, нысаналы көрсеткіштерге қол жеткізбеу себептері және қамту деңгейін 95 пайызға жеткізуге бағытталған шаралар талқыланды.

Емдеу-алдын алу бөлімінің дәрігер-инфекционисі Б.А. Әбдірахман АИТВ инфекциясының вертикальды жолмен берілуінің алдын алу мақсатында АИТВ-позитивті мәртебесі бар әйелдердің жүктілігін амбулаториялық кезеңде жүргізу мәселесіне тоқталды. Сондай-ақ перзентханаға АИТВ-ға тексерілмей түскен жүкті әйелдерді бір реттік тестілеуден өткізудің маңызы атап өтілді. Экспресс-тест нәтижесін жедел алу және бағалау үшін жүкті әйелдің медициналық бағытын тиімді ұйымдастыру қажеттігі де айтылды.

Семинардың мақсаты — медицина қызметкерлерінің АИТВ инфекциясының алдын алу, диагностика жасау, АИТВ инфекциясының вертикальды жолмен берілуіне жол бермеу, сондай-ақ дер кезінде емдеу мәселелері бойынша ақпараттану деңгейі мен кәсіби құзыреттілігін арттыру.

барлық жаңалықтар »