АИТВ-ны ерте анықтау: Астанада пилоттық жоба іске қосылды

 

Сәуір 27, 2026

Астанада 2026 жылғы 1 сәуірден бастап Астана қаласының Қоғамдық денсаулық сақтау басқармасы бастамасымен АИТВ инфекциясын ерте анықтауға бағытталған пилоттық жоба іске асырылуда. Жоба алғаш рет енгізіліп отыр және кеш анықтау жағдайларын азайтуға, тестілеудің қолжетімділігін арттыруға, сондай-ақ медициналық ұйымдардың АИТВ-ны ерте сатыда анықтаудағы рөлін күшейтуге бағытталған. Мамандардың айтуынша, АИТВ-ның кеш анықталуы әлі де тіркеліп отыр, бұл емдеудің күрделенуіне, науқастардың өмір сапасының төмендеуіне және инфекцияның әрі қарай таралу қаупінің артуына әкеледі. Ал дер кезіндегі диагностика терапияны уақтылы бастауға және болжамды айтарлықтай жақсартуға мүмкіндік береді.

Жобаны іске асыру аясында АИТВ инфекциясының алдын алу орталығының дәрігер-эпидемиологтары № 1 және № 3 көпбейінді қалалық ауруханаларда,              сондай-ақ № 7 және № 14 емханаларда оқыту семинарларын өткізуде.

Семинар барысында спикерлер АИТВ инфекциясын ерте анықтаудың негізгі аспектілерін және клиникалық көрсеткіштер бойынша тестілеудің практикалық тәсілдерін түсіндірді. АИТВ бар екенін көрсетуі мүмкін белгілер мен синдромдарды, ауруларды, сондай-ақ жиі және қайталанатын инфекцияларды тануға ерекше назар аударылады. Оқытуда науқастардың тексерілуі мен емделуге бейілділігін арттыруға бағытталған тексеруге дейінгі және кейінгі кеңес беру мәселелері де қамтылған.

 «АИТВ инфекциясының кеш анықталуы науқастардың өмір сүру ұзақтығы мен сапасына тікелей әсер ететін негізгі мәселелердің бірі болып қала береді. Алғаш рет жүзеге асырылып отырған пилоттық жоба осы жағдайды медициналық қызметкерлердің сақтығын арттыру, клиникалық көрсеткіштер бойынша тестілеу тәжірибесін кеңейту және ерте анықтау жүйесін күшейту арқылы өзгертуге бағытталған. Бұл шараларды жүзеге асыру медициналық көмектің сапасын арттыруға, АИТВ инфекциясының кеш анықталу жағдайларын азайтуға және ерте диагностиканың тиімді жүйесін қалыптастыруға ықпал етеді», – деді дәрігер-эпидемиолог Г.А. Сакупова.

Ағымдағы жылдың 1 қарашасынан кейін жобаның қорытындылары шығарылып, енгізілген тәсілдердің тиімділігіне бағалау жүргізіледі.

барлық жаңалықтар »