Денсаулықты таңдау — жастар арасында АИТВ-ның алдын алу

Желтоқсан 17, 2025

2025 жылғы 17 желтоқсанда Қарасай ауданында, Жібек жолы ауылында, Б. Момышұлы, А. Байтұрсынұлы және Ы. Алтынсарин атындағы орта мектептерде 8–11 сынып оқушылары арасында «Жастар — денсаулық пен АИТВ-сыз болашақ үшін!» тақырыбында ақпараттық-ағартушылық семинар өткізілді.

Семинарға 722 оқушы және 46 педагог қатысты.

Іс-шара барысында оқушыларға АИТВ инфекциясының берілу жолдары, жұқтыру қаупін төмендету тәсілдері, жыныстық жолмен берілетін инфекциялар, сондай-ақ уақтылы тестілеуден өтудің маңыздылығы және өз денсаулығына жауапкершілікпен қарау мәселелері бойынша толық әрі қолжетімді ақпарат ұсынылды.

Іс-шараның негізгі мақсаты — жасөспірімдер арасында АИТВ және басқа да инфекциялық ауруларға қатысты дұрыс, ашық әрі саналы түсінік қалыптастыру. Әлемдік тәжірибе көрсеткендей, білім мен ақпаратқа қолжетімділік — алдын алудың ең тиімді құралдарының бірі.

Семинар барысында АИТВ туралы жалған түсініктерді жоққа шығаруға ерекше назар аударылды. 

«АИТВ инфекциясының әлеуметтік шекарасы жоқ — ол кез келген адамға әсер етуі мүмкін. Сондықтан жасөспірімдерде өз денсаулығына жауапкершілікпен қарау, қауіпсіз мінез-құлық дағдыларын қалыптастыру, сондай-ақ репродуктивті және психикалық денсаулық мәселелері бойынша білім деңгейін арттыру аса маңызды», — деп атап өтті СПИД орталығының эпидемиолог маманы Н. Қасымов.

АИТВ инфекциясының алдын алу — бұл денсаулық сақтау жүйесінің ғана емес, білім беру ұйымдарының, ата-аналардың және жастардың ортақ жауапкершілігі. Осындай іс-шаралар Алматы облысында жасөспірімдердің ақпараттану деңгейін арттырып, денсаулықты сақтауға бағытталған тұрақты уәж қалыптастыруға ықпал етеді.

барлық жаңалықтар »