Соңғы жылдары БҚО-да АИТВ-ның вертикалды жұқтырудың бірде-бір жағдайы тіркелмеген

 

Желтоқсан 15, 2025

2025 жылғы 10 желтоқсанда Батыс Қазақстан облысында 1 желтоқсанда атап өтілетін Дүниежүзілік ЖИТС-пен күрес күніне орай баспасөз конференциясы өтті. Шара барысында 2025 жылғы Дүниежүзілік науқанның қорытындылары жасалып, өңірдегі АИТВ-ға байланысты эпидемиологиялық жағдайы таныстырылды. Спикерлер ретінде Облыстық АИТВ-инфекциясының алдын алу орталығының директоры Ақтілек Өмірбаев және оның орынбасары Алмагүл Мантакова сөз сөйледі.

Баспасөз конференциясында директор А.Өмірбаев өңірдің ЖИТС-пен күрестегі басты жетістіктерінің бірін атап өтті: «Соңғы жылдары Батыс Қазақстан облысында АИТВ-ның анадан балаға берілуінің бірде-бір жағдайы тіркелген жоқ. Бұл біздің алдын алу жүйеміздің тиімділігін, жүкті әйелдердің тексеруге қамтылуын және антиретровирустық терапияның уақтылы тағайындалуын көрсетеді. Мұндай нәтижелер - мамандардың, медициналық ұйымдардың және өз денсаулығына жауапкершілікпен қарайтын әйелдердің бірлескен жұмысының жемісі».

Директордың орынбасары Алмагүл Мантакова 2025 жылы  Дүниежүзілік ЖИТС-пен күрес науқаны 10 қарашадан 10 желтоқсанға дейін «АИТВ-ға қарсы күрестегі қиындықтардан – тиімді өзгерістерге» тақырыбымен өткенін, ол қол жеткізілген прогресті сақтау мен тұрақты алдын алу шараларын дамытуға бағытталғанын атап өтіп, негізгі нәтижелерді ұсынды:

  • Инъекциялық есірткі пайдаланушылар арасындағы АИТВ жағдайларының төмендеуі. «Зиянды азайту бағдарламаларын іске асырудың арқасында инъекциялық есірткі пайдаланушылар арасындағы сырқаттанушылық тұрақты түрде азайып отыр. Бағдарламаларға инъекциялық құралдарды айырбастау, жеке қорғау құралдарымен қамтамасыз ету, ақпараттық материалдар тарату және кеңес беру кіреді».
  • Жүктілерді толық қамту. «Жүкті әйелдерді АИТВ-ға тексеруге қамту 100%-ды, ал олардың серіктестерін қамту 95%-ды құрайды, бұл қауіптерді уақытында анықтауға және жүктіліктің қауіпсіз болуын қамтамасыз етуге мүмкіндік береді».
  • Перинаталдық трансмиссияның алдын алу. «2025 жылы АИТВ-мен ауыратын әйелдерден туылған 7 бала сау ретінде есептен шығарылды. Соңғы жылдары Батыс Қазақстан облысында АИТВ-ның анадан балаға берілуінің бірде-бір жағдайы тіркелген жоқ».

Науқанның қорытындылары өңірде жүргізіліп жатқан жұмыстың тиімділігін, ведомствоаралық ынтымақтастықтың маңыздылығын және профилактикалық іс-шаралардың жоғары деңгейін көрсетеді.

барлық жаңалықтар »